Þegar Fáskrúðsfjarðargöng voru tekin í notkun árið 2005 stóð til að ráðast fljótlega í fyrsta áfanga Suðurfjarðavegar. Nú, rúmum tveimur áratugum síðar, eru framkvæmdir loksins að hefjast við Reyðarfjarðarbotn þar sem vegurinn tengist hringtorgi við bæjarmörk Reyðarfjarðar.
Það eru vissulega góð tíðindi, en staðreyndin er sú að 21 ár eru liðin frá opnun ganganna og samkvæmt núverandi áætlunum á ekki að ljúka allri framkvæmdinni fyrr en um 35 árum síðar. Það er erfitt að skilja hvernig svona mikilvægur þjóðvegur fyrir Austurland getur setið svona lengi á hakanum.
Samkvæmt núverandi samgönguáætlun eru framkvæmdir á Suðurfjarðavegi tímasettar með eftirfarandi hætti:
- Reyðarfjarðarbotn, 1,7 km — 2027–2028 — kostnaður 2.020 m.kr.
- Fáskrúðsfjarðarbotn – Vík, 13 km — 2031–2035 — kostnaður 2.700 m.kr.
- Stöðvarfjörður – Kambaskriður, 9,3 km — 2030–2035 — kostnaður 2.100 m.kr.
- Vík – Stöðvarfjörður, 12,5 km — 2036–2040 — kostnaður 1.850 m.kr.
Þær framkvæmdir sem eru aftar verða að hætta að færast aftar og aftar í samgönguáætlun og þess í stað verður að flýta þeim.
Samanlagt er áætlað að framkvæmdin kosti um 8,7 milljarða króna á verðlagi dagsins í dag. En eins og alltaf með stór samgönguverkefni fylgir þessu ákveðin óvissa. Samkvæmt forsendum getur kostnaður verið á bilinu 85%-140% af áætlun. Það þýðir að endanlegur kostnaður gæti orðið allt frá um 7,4 milljörðum upp í rúma 12 milljarða króna.
Það sem vekur þó sérstaka athygli er að samhliða fyrsta áfanga framkvæmdanna á að skoða mögulega gangakosti á leiðinni. Það er í sjálfu sér jákvætt að allir kostir séu skoðaðir af alvöru. Jarðgöng gætu aukið öryggi, stytt leiðir og bætt samgöngur til lengri tíma.
Spurningin sem margir velta þó fyrir sér er hvort verið sé að fresta nauðsynlegum úrbótum með því að setja verkefnið aftur í endalaust matsferli. Það væri óásættanleg niðurstaða enda hefur Suðurfjarðavegur verið ræddur í áratugi og íbúar svæðisins þekkja vel hversu viðkvæmur kaflinn er yfir vetrartímann og þegar veður er slæmt.
Á meðan halda verðmæti áfram að fara þessa leið á hverjum einasta degi, sjávarafurðir, iðnaðarvörur og annar útflutningur sem skapar störf og tekjur fyrir Austurland og þjóðarbúið allt. Þess vegna snýst þetta ekki eingöngu um samgöngur fyrir íbúa heldur líka um atvinnulíf, öryggi og framtíð svæðisins.
Það þarf því að taka skýra ákvörðun um næstu skref. Austurland má ekki bíða endalaust eftir öruggum og traustum samgöngum. Það eina sem er í hendi er að Sjálfstæðisflokkurinn í Fjarðabyggð ætlar að halda áfram að berjast fyrir bættum samgöngum í sveitarfélaginu og Suðurfjarðavegurinn er svo sannarlega þar á meðal!
Höfundur er Stöðfirðingur og skipar sjötta sæti á lista Sjálfstæðisflokksins í Fjarðabyggð í sveitarstjórnarkosningum.